Sonam aur Raja Raghuwanshi murder case ne sabko hila dia hai. Janiye puri Indore murder mystery, police ki theory aur 5 bade sawal jinka jawab abhi bhi baki hai.
Ek nayi-nayi shaadi, honeymoon ki tayyari, aur phir achanak ek darawana murder – Sonam aur Raja Raghuwanshi murder case ne poore desh ko hila kar rakh diya hai. Is kahani ki shuruaat Madhya Pradesh ke Indore se hoti hai, phir Shillong ke junglo tak jaati hai aur ant mein Uttar Pradesh ke Ghazipur tak pahuchti hai. Pyaar, dhokha aur maut – teenon ka ek dangerous combination iss case ko ek mushkil paheli bana deta hai.
You may also read:- Shillong Murder Case: Sonam ke Boyfriend Raj ne hi Kiya Raja ka Antim Sanskar, Padosi ne Kiya Bada Khulasa – Indore News
Shaadi se Murder tak – 20 Din ki Mystery
11 May 2025 ko Indore ke Raja Raghuwanshi ki shaadi hui Sonam se. 9 din baad, 20 May ko dono honeymoon manane Meghalaya ke Shillong gaye. Lekin 2 June ko Raja ki laash ek gehri khai mein mili aur Sonam gayab ho gayi.
5 din tak koi pata nahi chala, phir 7 June ki raat Sonam Ghazipur ke ek dhabe par dikhi, jahan usne police ke saamne surrender kar diya. Sonam aur Raja Raghuwanshi murder case mein yeh pehla bada twist tha. Police ka kehna hai ki Sonam ne apne ex-boyfriend Raj Kushwaha ke saath milkar Raja ki hatya ki.
Pyaar ka Angle ya Ek Sochi-Samjhi Sazish?
Police ki theory ke mutabiq, Sonam Raj Kushwaha se pyaar karti thi, jo uske shop par kaam karta tha. Parivar ke pressure mein Raja se shaadi ki, lekin Raj ke liye feelings khatam nahi hui. Isliye honeymoon ke bahaane Raja ko Shillong le jaakar, Raj, Akash, Vishal aur Anand ke saath milkar uski hatya kar di gayi.
Ek CCTV footage mein Raja scooty par baitha dikhta hai, jabki Sonam kisi se door jaakar phone par baat karti dikhayi gayi. Sawal yeh uthta hai – kya woh call hatya ki planning ka hissa tha?
5 Bade Sawaal jo abhi bhi hain Unsolved
1. Kya Sonam ne Raja ki hatya ke liye supari di thi?
Police ne ab tak is baat par kuch spasht nahi kaha. Agar diya tha, toh woh supari killer kaun tha?
2. 17 din tak Sonam kahaan thi?
2 June se 7 June tak Sonam totally missing thi. Police usse trace kyun nahi kar payi?
3. Sonam Shillong se Ghazipur kaise pahunchi?
Koi ticket ya travel record nahi mila. Itni lambi journey kaise ki bina kisi clue ke?
4. Indore ki rehne wali Sonam Ghazipur kyun gayi?
Agar surrender karna tha toh woh Shillong ya Indore kyun nahi gayi?
5. Kya Ghazipur ka kisi dusre accused se connection hai?
Kahin yeh murder case ek bade gang ya criminal network ka hissa toh nahi?
WhatsApp Chats ne Kholi Sazish ki Pol
Police ne Sonam Raghuwanshi aur Raj ke beech ek saal ki WhatsApp chat history nikaali hai. In chats mein unke beech intimate aur suspicious conversations mile, jisme murder planning ka bhi sanket mila. Yeh chats hi Sonam ke khilaaf sabse strong evidence ban kar saamne aaye.
Sonam Raghuwanshi ke Parivaar ka Dawaa: Beti Ko Phasaya Gaya Hai
Sonam Raghuwanshi ke parivaar ne police ki story par sawal uthaye hain. Unka kehna hai ki unki beti Raja ki killer nahi ho sakti. Unka maan na hai ki police ne galat narrative banaya hai aur asli sach ko chhupaya ja raha hai. Wo CBI investigation ki demand bhi kar rahe hain.
Raja Raghuwanshi ke Parivaar ka Reaction
Raja Raghuwanshi ke bhai Vipin ka kehna hai ki honeymoon ka poora plan Sonam ne hi banaya tha. Sirf jaane ki ticket book karayi gayi thi, wapas aane ki nahi. Unhe pehle se shak tha ki kuch to galat hai. Vipin kehte hain ki Sonam ek shaatir planner hai aur poori planning usne hi ki thi.
Current Update: Sonam Shillong Jail Mein
Sonam Raghuwanshi ka medical test hua. Uske baad Meghalaya police use apne saath Shillong le gayi. Police ne Raj Kushwaha, Akash, Vishal aur Anand ko bhi arrest kar liya hai. Ab police poori team se poochtaach kar rahi hai. Sonam Raghuwanshi aur Raja Raghuwanshi murder case mein naye raaz rozana samne aa rahe hain.
Kya Ye Case Ab Solved Hai?
Meghalaya police ka kehna hai ki unhone case solve kar liya hai. Lekin jitne bhi loopholes hain, unse yeh saaf hai ki kahani mein abhi bhi kai raaz baaki hain. Kya Sonam hi mastermind thi? Ya uske peeche koi aur bada network tha? Kya yeh sirf ek love triangle tha ya kisi aur badi wajah se yeh murder hua?
Conclusion: Sawaal Abhi Bhi Zinda Hain
Sonam Raghuwanshi aur Raja Raghuwanshi murder case ne desh bhar mein charcha chhed di hai. Social media par log apni-apni theories share kar rahe hain. Police ki story ke baawjood, kai sawal abhi bhi jawab ka intezaar kar rahe hain. Jab tak court mein trial complete nahi hota, sach ka pata lagna mushkil hai.
Aapko kya lagta hai? Kya Sonam hi asli doshi hai? Ya phir is case mein abhi bhi koi bada sach chhupa hua hai?